5. Vacca et capella, ovis et leo Phaedr. 1, 5

Numquam est fidelis cum potente societas:1

Testatur haec fabella propositum meum.

Vacca et capella et patiens ovis iniuriae

Socii fuere cum leone in saltibus.

Hi cum cepissent cervum vasti corporis,5

Sic est locutus, partibus factis, leo:

»Ego primam tollo, †nominor quia leo;

Secundam, quia sum fortis, tribuetis mihi;

Tum, quia plus valeo, me sequetur tertia;

Malo afficietur si quis quartam tetigerit.«10

Sic totam praedam sola improbitas abstulit.