3. Graculus superbus et pavo Phaedr. 1, 3

Ne gloriari libeat alienis bonis1

Suoque potius habitu vitam degere,

Aesopus nobis hoc exemplum prodidit.

Tumens inani graculus superbia,

Pennas, pavoni quae deciderant, sustulit5

Seque exornavit. Deinde contemnens suos

Se immiscuit pavonum formoso gregi.

Illi impudenti pennas eripiunt avi

Fugantque rostris. Male mulcatus graculus

Redire maerens coepit ad proprium genus;10

A quo repulsus tristem sustinuit notam.

Tum quidam ex illis, quos prius despexerat:

»Contentus nostris si fuisses sedibus

Et quod natura dederat voluisses pati,

Nec illam expertus esses contumeliam15

Nec hanc repulsam tua sentiret calamitas.«